Ва ўсім свеце 21 лютага адзначаюць Міжнародны дзень роднай мовы. Ён быў абвешчаны ЮНЕСКА ў лістападзе 1999 года, на 30-й сесіі Генеральнай канферэнцыі. Гэтая ініцыятыва была накіравана на падтрымку моўнай разнастайнасці, шматмоўнай адукацыі і ўсведамлення важнасці моўных і культурных традыцый.
Да Міжнароднага дня роднай мовы ў цэнтральнай раённай бібліятэцы імя І. Пехцерава правялі інтэлектуальную гульню “Ручай крыштальны мовы роднай”.
У ёй прынялі ўдзел чатыры каманды: “Васількі” (сярэдняя школа № 3), “Клубніцы” (раённая гімназія), “Журавіны” (сярэдняя школа № 1), “Каласок” (сярэдняя школа № 4).
Камандам было прапанавана выканаць розныя заданні на веданне беларускай мовы і беларускіх пісьменнікаў. 
У выніку лепшыя веды паказала каманда “Васількі”. На другім месцы каманда “Каласок”, на трэцім —“Журавіны”. 
Усе каманды атрымалі адпаведныя дыпломы і салодкія прызы ад райкама ГА “БРСМ”.
Гэта мерапрыемства дало дзецям магчымасць акунуцца ў чароўны свет роднай мовы, ўзбагаціць свае веды пра культуру Беларусі, пра родную мову і літаратуру.
Увогуле, у бібліятэках Клімаўшчыны Дню роднай мовы прысвечаны цыкл мерапрыемстваў. Арганізаваны кніжныя выставы пад назвамі “Чароўныя радкі роднай мовы”, “Мелодыя роднага слова”, “Жывая крыніца беларускай мовы”, “Дакраніся да роднага слова”, “Мая мова, мой свет, мая душа”, “Мову матчыну шануйце” і іншыя. Супрацоўнікі дзіцяча-юнацкага сектара правялі сеткаваю акцыю “Родная мова — жывая душа народа”. У Барсукоўскай бібліятэцы праходзіла акцыя “Чытаем па-беларуску разам”, гадзіну роднай мовы “Ведай і любі родную мову” правялі ў бібліятэчным пункце цэнтральнай раённай бібліятэкі, гульню-конкурс “Пагуляем у роднае слова” правяла для дзяцей бібліятэкар Палошкаўскай бібліятэкі. 
Дзень роднай мовы асаблівы для кожнай нацыі, кожнага народа, бо няма народа без мовы, няма мовы без яго носьбіта. Нам, беларусам, у спадчыну дасталася ўнікальная мова – жывая і мілагучная, песенная і паэтычная, старажытная і сучасная… Шануйце ласкавае роднае слова, шануйце родную матчыну мову! Памятайце, без мовы няма чалавека, няма нацыі, няма краіны!
Фотаздымкі Клімавіцкай бібліятэчнай сеткі.
